ମୁଁ ପରା ନାରୀ

ଶୁଣ ହେ ପୁରୁଷ
ମୋ ମନ ରାଇଜ
ଗୋପ୍ଯ କାହାଣୀ
ରାମ ପରି ସ୍ୱାମୀ ହେଉ
ଗୋଟାପଣେ ପାଶେ ଥାଉ
ତଥାପି ମୋ ମନ ଖୋଜେ
ସୁନା ହରିଣୀ

ହେଉପଛେ ଅପଦାର୍ଥ
ନ ଥିଲେ ସ୍ୱାମୀ ସାନିଧ୍ଯ
ସ୍ୱର୍ଣ୍ଣ ଲଂକା ପାଦେ ଲୋଟୁ
କୋଟି ସେବାକାରୀ ଖଟୁ
କେହି ନ ପାରଇ ମୋର
ମନକୁ ଜିଣି

ତେଣୁ ଶୁଣ ହେ ପୁରୁଷ
ଢାଳିଣ ସମ୍ପଦ ବିଷ
କରିବାକୁ ମନ ତୋଷ
କିମ୍ପାଇଁ ବୃଥା ପ୍ରୟାସ
କେ ଅବା ପାରି ?

ରାମ ପରା ପ୍ରଭୁ ଆହା
ନ କରି ପାରିଲେ ଯାହା
କିମ୍ପା ବାଢୁଛ ଆସ୍ପର୍ଦ୍ଧା
ମୁଁ ପରା ନାରୀ

ସ୍ୱାଭିମାନ ମୋ ଭୂଷଣ
ଟୋପାଏ ସେନେହ ସାଥେ
ଟିକିଏ ସମ୍ମାନ
ତା’ଠୁ ଅଧିକ ନ ଲୋଡଇ
କେ ବା ଏତିକି ବୁଝଇ
ନାରୀ ତ ଅଟଇ ବିଶ୍ୱ କଲ୍ଯାଣକାରୀ
ମୁଁ ପରା ନାରୀ
ବିଶ୍ୱ କଲ୍ଯାଣକାରୀ